Қаңтардың 29-ы күні С.Бәйішев атындағы Ақтөбе облыстық әмбебап ғылыми кітапханада батыр әрі би Әзберген Мұңайтпасұлына арналған «Болмысы бөлек батыр – Әзберген» тарихи кеші өтті. Кештің басты қонағы – батырдың ұрпағы, профессор, филология ғылымдарының докторы, ҚР Педагогикалық ғылымдар академиясының академигі, Қазақстан Жазушылар одағының мүшесі, ҚР Білім беру ісінің құрметті қызметкері, «Облысқа сіңірген еңбегі үшін», «Ақтөбе қаласын дамытуға қосқан үлесі үшін» және «Үздік өлкетанушы» төсбелгілерінің иегері Жұманазар Асанов.
Тарихи кештің негізгі мақсаты – заманында батыр әрі би болған Әзберген Мұңайтпасұлының ерліктерін насихаттау. Ұлттың азаттығы, халықтың еркін өмір сүруі үшін батыр Әзбергеннің заманындағы үзеңгілестерімен бірге басын бәйгеге тіккені, бүтін елді бодан қылуды ойлаған сол кездегі билікке қарсы бас көтергені туралы нақты тарихи деректерді алға тартып, жас ұрпаққа тарихты таныстыру. Сондай-ақ жалпы патриоттық сананы жаңғырту.
Аталған іс-шараға ақын, ҚР Педагогикалық Ғылымдар Академиясының академигі Нұрлыбек Қалауов, өлкетанушы, Есет Көтібарұлы атындағы қордың басшысы Аманғали Мұхамбетуллин, еңбек ардагері, батырдың ұрпағы Закария Шеріпов, «Ер Едіге» қоғамдық қорының төрағасы, қоғам қайраткері, Ақтөбе қаласының ардагерлер кеңесінің және қалалық қоғамдық кеңестің төрағасы Ахат Мырзалин, медицина қызметкерлері облыстық кәсіподағының төрағасы, медицина саласының ардагері Жексен Көптілеуов, Ақтөбе қалалық мәслихат депутаты, еңбек ардагері Қайырбек Тоқтаров, мемлекеттік қызмет саласының ардагері және Мөңке бидің 350 жылдығын атап өтуге құрылған комиссияның төрағасы Марат Мұңайтпасов сынды өңірге белгілі азаматтар қатысты.
Кеш барысында қатысушылар құнды тарихи дерек-мәліметтерді ортаға салып, батыр Әзбергеннің болмысын аша түсті. Олар іс-шараға қатысушы студент-жастарға Әзберген Мұңайтпасұлы мен Қарағұл Қонақбайұлының тарихтағы орны, ел бірлігі жолында көрсеткен ерліктері турасында әңгімелеп берді.
Іс-шара барысында ақын-жыраулардың батырға арнаған жыр-толғаулары оқылды. Әзбергеннің адамдық болмысын жоғары бағалаған күйші Қазанғаптың батырға арнаған «Кел сана, батыр, кел сана» күйі күмбірлеп, тарихи терме орындалды. Сонымен қатар қатысушылар кеш қонағы Жұманазар Асановты мерейлі 75 жасымен құттықтап, ізгі тілектерін арнады. Кітапхана директоры Сұлушаш Хакимова батырдың ұрпағы Жұманазар Асановқа алғысын білдірді.