15 қазан күні С.Бәйішев атындағы облыстық әмбебап ғылыми кітапханасында қазақтың біртуар ақыны, жалынды жазушы, дарынды драматург, қазақ әдебиетінің негізін қалаушылардың бірі Сәкен Сейфуллиннің 130 жылдық мерейтойына арналған «Сәкеннің сыршыл әлемі»   әдеби кеші өтті. Кешке ақын, аудармашы, Қазақстан Жазушылар одағының мүшесі Гүлімай Әбішқызы, журналист, ақын, Қазақстан Жазушылар және Журналистер одағының мүшесі Индира Кереева мен №8 орта мектебі қазақ тілі мен әдебиеті пәні мұғалімі Шатенова Айнаш Тәжіқызы қатысып, оқырмандарға С.Сейфуллиннің өмірі мен шығармашылығы жөнінде сыр шертіп, тың ақпараттармен бөлісті. Сонымен қатар, жыршы Демеубай Құрмашұлы ақынның «Тау ішінде» әнін көрермендерге тарту етті. Шара барысында Астана қаласындағы С.Сейфуллин атындағы әдеби-мемориалдық мұражайы жолдаған бейне-сюжет көрсетілді. Әдеби кеште №8 орта мектебінің 10-сынып оқушылары Бейбарыс Жандыков, Ислам Сагиндиков, Ислам Сайынов, №45 орта мектебінің 10-сынып оқушысы Әмина Аманғос, Қ.Жұбанов АӨМУ студенті Айдана Қайырбек ақын өлеңдерін мәнерлеп оқыды. Ақынның шығармашылығына арналған «Сәкеннің сыр сандығы» кітап көрмесі жасақталып, библиографиялық шолу таныстырылды. Кеш соңында кітапхана директоры Хакимова Сұлушаш Максимқызы шара қатысушыларын алғыс хатпен марапаттады.