29 қазан күні қоғам қайраткері, ғалым, экономика ғылымдарының докторы, профессор, Қазақстан Ғылым Академиясының академигі Сақтаған Бәйішевтың 115 жылдығына арналған «Сақтаған Бәйішев – ғибратты ұстаз, қайраткер» облыстық ғылыми конференциясы өтті.
          Шара жүргізушісі ақын, композитор, ҚР мәдениет саласының үздігі Орал – Қосай Байсеңгір алғы сөзді Ақтөбе облыстық мәдениет, архивтер және құжаттама басқармасының басшысы Алтынай Юнисоваға беріп, Ардагер-ұстаз, ғалым-педагог, педагогика  ғылымдарының  кандидаты, профессор, КСРО және Қазақ КСР халық  ағарту  ісінің  үздігі, Ақтөбе  облысының Құрметті азаматы Ниетжан  Беріков, ҚР Әлеуметтік ғылымдар академиясының академигі, философия ғылымдарының докторы, М.Оспанов атындағы Батыс Қазақстан Медицина университетінің «Қоғамдық-гуманитарлық пәндер» кафедрасының профессоры Алтай Тайжанов, Қ.Жұбанов атындағы Ақтөбе өңірлік университеті экономика ғылымдарының кандидаты, профессор Бауыржан Жүнісов, С.Бәйішевтің туыстары Қараторғай Құлбатыров, Самбай Байтақов Ақтөбе қаласы ардагерлер Кеңесінің төрағасы, қалалық Қоғамдық Кеңесінің төрағасы Ахат Мырзалин, қоғам қайраткері, Актөбе қаласы Астана ауданы ардагерлер кеңесінің төрағасы Нұрхан  Агниязов қатысып, ғалымның өмір жолы, ғылымдағы алатын орны және білім беру, отандық ғылымды дамыту, елдің қоғамдық-саяси өміріндегі орны туралы  баяндама оқып, естеліктерімен бөлісті.
       Кітапхана қызметкері Рысжан Карагулова «Азамат.Ғалым.Қайраткер» кітап көрмесіне библиографиялық шолу өткізіп, оқырмандарға «Абзал адам, ғұлама ғалым» фото-шежіре слайд, ҚР Мемлекеттік орталық музейі бас қор сақтаушысы Үміт Ашимова жолдаған музей қорында сақталған академик Сақтаған Бәйішевтің жәдігерлері туралы бейнежазбасын ұсынды.  Сонымен қатар, ғылыммен айналысып жүрген Сақтаған Бәйішев атындағы Ақтөбе университеті мемлекеттік және жергілікті басқару білім беру бағдарламасының білім алушысы Лунара Селбаева, Ақтөбе Жоғары гуманитарлық колледжінің студенті Альбина Елемесова «С.Бәйішев соғыс жылдарында», «Ғалым есімі елінің жадында» тақырыпта баяндамалар оқыды. Кітапхана директоры Сұлушаш Хакимова барша облыстық ғылыми конференция қатысушыларына алғыс білдірді.