22 қараша күні еңбек ардагері, ҚР мәдениет қайраткері, өлкетанушы-этнограф, «Құрмет» орденіңің иегері Еркін Құрманбектің 80 жасқа толуына арналған «Жақсылық жаршысы» атты сыр-сұхбаты өтті. Мәдениет қайраткерінің өмірі мен еңбек жолын кейінгі жастарға насихаттап, үлгі ету мақсатында ұйымдастырылған іс-шараға Ақтөбе   облыстық мәдениет, архивтер және құжаттама  басқармасының маманы Әсемгүл Жұманова; ақын, Қазақстан Жазушылар одағының мүшесі Нұрлыбек Қалауов; «AMANAT» партиясы Ақтөбе облыстық филиалы атқарушы хатшысының орынбасары  Әсел Сарманова, «Қоғамдық келісім» мекемесі Ақтөбе облыстық аналар кеңесінің төрағасы Роза Серғалина; күйші Жайлаубай Асылханов; «Нобель» баспасының директоры Нұрлан Жұмағалиев; Мәртөк аудандық музейінің директоры Ұлдай Осанова; сатирик, «Екі езу» әзіл-сықақ театрының директоры Нұрлыбек Жұбатқан және мәдениет қызметкерлері қатысып, Еркін Жолмырзаұлының тәуелсіз ел болып қалыптасқан жылдарындағы еңбегі,  Ақтөбе мәдениетінің өркендеуіне қосқан зор үлесі туралы баяндап берді. «Екі езу» әзіл-сықақ театрының әртістері Гүлсім Қаратаева, Бекбол тәтебаев, Медет Қалиев өздерінің ізгі лебіз-тілектерін білдіріп, Еркін Жолмырзаұлының мерейлі 80 жасына арнайы дайындалған Нұрлыбек Жұбатқанның «Мақтау» қойылымын қойып, қатысушыларды күлкіге қарық қылды. Кеш иесі ризашылығын білдіріп, қошемет көрсетті.
        Сыр-сұхбат барысында кітапханашы Рысжан Қарағұлова оқырмандарға «Ел мәдениетінің Еркіні» атты кітап көрмесіне библиографиялық шолу жүргізіп, кеш жүргізушісі, ақын Балагүл Бакиева қатысушыларға арнайы дайындалған фото-слайдты ұсынды. Сонымен қатар, іс-шараны ҚР Мәдениет саласының үздігі, «Құрмет» орденінің иегері, кәсіби домбырашы Бақытбек Зейнелов жетекшілік еткен №1 Балалар музыка мектебінің «Көңілашар» фольклорлық ансамблі Нұргиса Тілендиевтің «Қаражорға» күйімен бастап, Қазанғаптанушы, ҚР еңбек сіңірген қайраткері Жайлаубай Асылханов Дина Нұрпейісованың «Науаи» күйін, №1 қалалық балалар саз мектебінің шәкірті, Фариза Оңғарсынова атындағы №41 мектеп гимназиясының оқушысы Мақсат Жолаушыбай «Молдабайдың әнін» орындап, жетекшілік жасаған ұстаз Нұргүл Шайық  №1 балалар саз мектебінің «Домбыра Дастан» дәстүрлі әншілер ансамблінің орындауындағы «Ел тілегі» әнімен аяқтады.  Шара соңында кітапхана директоры Сұлушаш Хакимова мәдениет майталманы Еркін Құрманбекті мерейлі жасымен құттықтап, атсалысқан қатысушыларға алғыс білдірді.