12 желтоқсан күні Ақтөбе жоғары гуманитарлық колледжімен бірлесіп тіл білімі саласындағы қазақтың алғашқы профессоры, түркітанушы, педагог Құдайберген Жұбановтың 125 жылдығына арналған  «Ұлттың ұлы тұлғасы» облыстық тарихи-танымдық конференциясы өткізілді. Іс-шараның мақсаты – Құдайберген Жұбановтың ғылыми еңбектері мен ұлт мәдениетіне және өнеріне қосқан үлесін дәріптеу, жас ғалымдарға танымы терең тұлғаның ғылымдағы даңғыл жолын таныту. Ұлт перзентінің қайраткерлік еңбегін, кейінгі жас буынға қалдырған рухани-мәдени мұраларын насихаттау.
Конференцияға филология ғылымдарының кандидаты, С.Бәйішев атындағы университеттің академиялық доценті Ардақ Жұбанова, Қ.Жұбанов атындағы Ақтөбе өңірлік университеті филология ғылымдарының магистрі Ғаламат Әрібаев, Ақтөбе жоғары гуманитарлық колледжінің директоры Жанар Алишева қатысып, «Тұғырлы тұлға», «Қ.Жұбанов - феномен тұлға», «Кейбір мәдени және мұрағат деректерінің  құпия мағынасы» тақырыбындағы баяндамаларында тұлғаның өміржолынан тың деректерді ортаға салды.
Конференция барысында Ақтөбе жоғары гуманитарлық колледжінің студенттері Зеріп Сермұқанова, Мұқағали Маралұлы, Ақжүніс Нарбаева, Ақжан Ахмедияр «Қазақ тілін оқыту әдіістемесінің Қ.Жұбанов ілімімен сабақтастығы»,  «Ғылым көгінің жарық жұлдызы»,  «Қазақ тіл білімінің көшбастаушысы», «Қ.Жұбановтың қазақ сөздерінің буындық құрамына қатысты зерттеу еңбектері» баяндамаларын жасап,  Қ.Жұбановтың «Ай» өлеңін оқып берді. Сонымен қатар, кітапхана қызметкерлері Рысжан Қарағұлова, Аманжол Сламғали оқырмандарға «Құдайберген Жұбанов – ұстаз, азамат, дарын иесі» кітап көрме ұйымдастырып, библиографиялық шолуды және Ембі қаласындағы «Ағайынды Жұбановтар» мемориалдық музейі жолдаған бейнежазбаны ұсынды.