С.Бәйішев  атындағы  облыстық  әмбебап  ғылыми кітапханада 14 ақпан – халықаралық кітап сыйлау күніне орай «Кітапханаға кітап сыйла» акциясы өтті. Аталған акцияның мақсаты – оқырмандардың кітапханаға жеке кітаптарын сыйлай отырып, кітапхана қорын толықтыру, кітап оқуды кеңінен насихаттау.

Шараға Ақтөбе  облыстық мәдениет, архивтер және құжаттама басқармасы басшысының орынбасары Мәншүк Балмағамбетова, «Құрмет», «Парасат» орденінің иегері, Ақтөбе облысының құрметті азаматы, Қазақ ғылымына еңбек сіңірген қайраткер, философия ғылымдарының докторы, профессор Алтай Тайжанов, ақын, Қазақстан Жазушылар одағы басқармасының Ақтөбе облыстық филиалының төрағасы, облыстық мәслихат депутаты Бижан Қалмағанбетов, композитор, Мәдениет қайраткері Мақсым Меңкешов, кәсіпкер Ғибат Қыдыралин, ақын, аудармашы, Қазақстан Жазушылар одағының мүшесі Гүлімай Қуанышева, жазушы, Қазақстан Жазушылар одағының мүшесі Назарбек Нұрмағанбетов, «Шатлық» Ақтөбе облыстық татар және башқұрт этно-мәдени бірлестігінің жетекшісі Эльвира Хабибуллина және «Славян» этно-мәдени бірлестігінің жетекшісі Любовь Пинаева, «Тахауи Ахтанов кітап үйі» ЖШС-ның директоры Варвара Дускеева және өңірге белгілі зиялы қауым өкілдері мен оқырман жастар қатысып, кітапхана қорына түрлі бағыттағы кітаптарды сыйға тартты.

Мерекелік шара барысында ақын Б.Жақыптың «Кітап туралы ой», Ә.Нілібаевтың «Кітап» өлеңдері оқылды. Әндер шырқалып, қонақтар мен оқырмандар қошемет көрсетті. Сонымен бірге республикалық «Бір ел – бір кітап» акциясына таңдалған Қабдеш Жұмаділовтің шығармашылығына, облыстық «Оқитын өлке» акиясына таңдалған қаламгерлер Бәкір Тәжібаевтың және Ертай Ашықбаевтың шығармашылықтарына арналған және «Тахауи Ахтанов кітап үйінің» жаңа кітаптарынан жасақталған кітап көрмелері таныстырылды.