29 қазан күні 18.00-23.00 аралығында Егемендігіміздің 30 жылдық мерейтойына орай Ақтөбе облысы бойынша бір уақытта барлық облыстық, қалалық, аудандық және ауылдық кітапханаларда «Кітапхана түні - 2021» әлеуметтік-мәдени шарасы өткізілді.  Ашылу салтанаты Ұйымдастырушылық қамтамасыз ету бөлімі мен Жұртшылықпен байланыс және бұқаралық жұмыс секторы ұйымдастырған «Тәуелсіздікке тарту» атты мерекелік кешпен басталды.«Кітапхана түні - 2021» мәдени шарасы күзгі кештердің бірін, кітапханадағы ең жақсы естеліктер сақталатын тамаша оқиғаға айналдырды. Мәдени шараны Ақтөбе облысының мәдениет, архивтер және құжаттама басқармасы басшысының орынбасары Балмағамбетова  Мәншүк  Сәлімқызы ашып, жылы лебізін білдірді. «Қазақстандық салалық мәдениет,спорт, туризм және ақпарат  қызметкерлерінің кәсіптік  одағы» Қоғамдық бірлестігінің  Ақтөбе облыстық филиалының төрайымы Назира  Сәрсембайқызы Табылдинова  мен «Алые паруса» үлгілі жастар театрының  көркемдік  жетекшісі  Киек  Надежда  Николаевна жылы тілектерін жеткізді.
Манғыстау, Атырау, Қызылорда,   Батыс Қазақстан облыстарынан және облыстық  зағип  және  нашар көретін  азаматтардың  арнаулы  кітапханасынан келген  әріптестеріміз  шараның  қонағы  болды. Кітапхана түніне келушілер жаңа кітап, газет-журналдар, қылқалам шеберлері көрмесінің, жергілікті ақын-жазушылармен кездесудің, шеберлік сағаттарының, интеллектуалдық алаңдағы түрлі викториналық ойындардың, сыр-сұхбаттардың, оқырмандар сайысының, мерекелік концерттік бағдарламаның, тақырыптық ойын-сауық кешінің, театрландырылған көріністердің куәсі болды. «GREEN FEST» қолөнершілер жәрмеңкесі ұйымдастырылды. Ғарыш әлемі тақырыбында безендірілген Америка бұрышында  жасөспірімдерге арналған қызықты ойындар өткізіліп, фильм көрсетілді. Қаламыздағы танымал «Медиа Про» продюсерлік орталығының өнерпаздары, клуб мүшелері, жастар Кітапхана түнінде өз өнерлерін ортаға салып, ұмытылмас көңіл-күй сыйлады.