5 қараша күні кітапханада Ақтөбе қаласының құрметті азаматы, тарихшы-ғалым, профессор Закраддин Байдосов атындағы кабинеттің ашылуы өтті. Ғалымның өзі қатысқан жиынды Ақтөбе облысының мәдениет, архивтер және құжаттама басқармасының басшысы Юнисова Алтынай Юнисқызы ашты. Ақтөбе қаласының құрметті азаматы, Мәдениет қайраткері Еркін Жолмырзаұлы Құрманбек, Қ. Жұбанов атындағы өңірлік мемлекеттік университетінің ұжымы атынан Мұхтаров Сабыржан Сағидуллаұлы сөз сөйлеп, ғалымның осы кезге дейін атқарған ғылыми еңбегіне зор бағасын беріп, ашылған кабинеттің ғылым іздеген жастарға өте қажет екенін айтты. Бұл кабинетте Закраддин Байдосовтың тұтынған заттарымен қатар, сонау жылдардағы майшаммен оқыған 1500 дана құнды кітаптары мен ғылыми еңбектері бар.
Шарада сөз сөйлеген Закраддин Байдосов: «Еңбегімді елеп, құрмет көрсеткендеріңізге көп рақмет», - деп кітапхана ұжымы мен тілектес жандарға алғысын білдірді. Мәдениет қайраткері Перуза Нарман әннен шашу шашып, көрерменнің көңілін көтеріп тастады. Ғалымның еңбектеріне арналған «Ел ардақтаған азамат» атты кітап көрмесі ұйымдастырылды.