22 сәуір күні сағат 18.00 - 21.00 аралығында «YMYRTTAĞY KITAPHANA» әлеуметтік-мәдени шарасы өтті. Кеш барысында кітапхана келушілерге әдеттегі жұмыс уақытынан кейін, яғни кешқұрым есігін айқара ашты. Шараның негізгі мақсаты - кітапхана ісін дамыту, кәсіби ынтымақтастық құрылымдарда қоғаммен байланыс жасау, сонымен қатар кітап оқуды насихаттау және бос уақытты мазмұнды өткізу арқылы жаңашылдыққа бет бұру. Кітапхана кешіне келушілер жаңа кітаптардың, газет-журналдардың көрмесін тамашалап, Ақтөбе гуманитарлық колледжінің студенттері «Қазақ әдебиетіндегі Ана әлемі» атты қойылымын көрсетіп, ән-жыр, би, әдеби-сазды кеш ұйымдастырса, «Рухнама» шығармашылық орталығының жастары жүрекжарды - жырларын тарту етті. Сонымен қатар шараға қатысушылар «Өзгеріс өзімнен басталады» атты психологиялық-мотивациялық тренингке қатысып, түрлі интеллектуалды викториналық сайыстардың куәсі болды. Шара барысында «Өнерлінің өрісі кең» қолөнер жәрмеңкесі өткізіліп, өздерінің әдемі бұйымдарымен кешті әсерлендіре түсті.