С.Бәйішев атындағы Ақтөбе облыстық әмбебап ғылыми кітапханасында  Қазақстан қолөнершілер Одағының мүшесі, ЮНЕСКО сапа белгісінің иегері, қолөнер шебері Әбілов Ерқосай Қожбанұлы  оқырмандармен  кездесті. «Қолөнер – сырлы өнер» тақырыбын арқау еткен  кездесу барысында қолөнер шебері Әбілов Ерқосай Қожбанұлы  сан ғасырлық тарихы бар, ұрпақтан ұрпаққа мирас болып жеткен қолөнердің қыр-сырына тоқталып, өзінің  қолөнер әлемінде дәстүрлі бағыттағы ұлттық өнеріміздің даму жолындағы ізденіс  үстіндегі ұстанымы мен нәтижелері туралы сөз өрбітіп, алдағы жоспарларымен бөлісті. Оқырмандар тарапынан қойылған сұрақтарына тоқталып өтті.
  Кездесу кешіне  қала  мектептерінен  еңбек пәнінің  ұстаздары, №40  ЖББОМ директорының тәрбие ісі жөніндегі  орынбасары Қобыландина Майра Жұмақызы және оқушылары, арнаулы оқу орындарының студенттері қатысты. Ахмет Жұбанов атындағы Ақтөбе музыкалық колледжінің студенті Сымбат  Нұржанқызы  Наурызбек  жыраудың  «Толғау, толғау сөздер бар» термесі мен №40 жалпы білім беретін орта мектебінің 8 «Г» оқушысы  Танкенов  Темірлан  «Адай» күйін тарту етті. «Қолөнердің де құпиясы бар» кітап көрмесі жасақталды. Көрмеге құнды фотосуреттермен безендірілген Тохтабаева Шайзада Жаппарқызының  «Қазақтың зергерлік өнері», темірден түйін түйген ағайынды үш ұста –Құлментегі Тұрсынжан, Махмұт, Айтберген Жетенұлдарының  «Темірші ұсталар» альбомы, «Зергерлік өнер әлемі» екі томдық кітап және т.б еңбектерімен қатар, Ақтөбелік  қолөнер шеберлері туралы деректер қойылды.