12 наурыз күні кітапхана қызметкерлері ғалым, тарих ғылымдарының докторы, профессор, Қазақ КСР Ғылым академиясының корреспондент мүшесі Ермұхан Бекмаханұлы Бекмахановтың туғанына 110 жыл толуына орай «Қазақтың тұңғыш кәсіби тарихшысы» ғылыми-теориялық кеш өткізді.
    Еліне ғалым ретінде танымал Ермұхан Бекмахановтың ғылыми-творчестволық жұмысын кеңінен насихаттап, оның есімі мен еңбектерін қазақ тарихында мәңгі қалдыру мақсатындағы шараға М.Оспанов атындағы Батыс Қазақстан медициналық университеті, «Қоғамдық – гуманитарлық пәндер» кафедрасының доценті Б.А. Молдин, Қ.Жұбанов атындағы АӨУ,   «Тарих және дінтану» кафедрасының аға оқытушысы, тарих ғылымдарының кандидаты Ж.А.Ғанибаева, «Кемел-білім» мектеп-лицейінің тарих пәні мұғалімі Ш.С.Каирова қатысып, қазақтың аса көрнекті тарихшысының бізге аманат етіп қалдырған  бай рухани мұрасын, атқарған істерін көпшілік қауымға таныстырды.
Шараға «Дүние» көпсалалы және құрылыс-монтаж колледждерінің  оқытушылары мен студенттері, қала мектептерінің тарих пәні мұғалімдері мен кітапханашылары, кітапхана оқырмандары қатысты.
Шара барысында кітапхана оқырмандарының назарына ұйымдастырылған «Тағдыры күрделі қайсар талант» атты кітап көрмесіне кітапханашы Ә.Төлегенова библиографиялық шолу жасап, Е.Бекмахановтың өмір жолын баяндаған бейне баян мен «Аманат» кинофильмінен үзінді көрсетілді.