20 ақпан күні «Тарихы терең Ақтөбе» жобасы аясында ақын Таразы Қаленқызының  160 жылдығына арналған «Таразы ақын» тарихи-танымдық кеші ұйымдастырылды. Шараның мақсаты – Есет батыр Көтібарұлының келіні, ақын Таразының өмірі мен шығармаларын насихаттау. Кешке профессор, филология ғылымдарының докторы, ҚР Педагогикалық ғылымдар академиясының академигі, Қазақстан Жазушылар одағының мүшесі, Шалқар ауданының құрметті азаматы Жұманазар Асан, «Есет батыр Көтібарұлы атындағы» қорының төрағасы, ҚР «Үздік өлкетанушысы», Шалқар ауданының құрметті азаматы Аманғали Мұхамбетулин, ҚР Журналистер одағының мүшесі Қанатбай Елеусізұлы, жыршы Демеубай Жолымбетов және тағы да басқа зиялы қауым өкілдері, сонымен қатар Таразы ақынның ұрпақтары Жетес Бекмурзин, Қуанышбай Күмісбаев, Қамарсұлу Қиясова қатысты.
Шара барысында қонақтар ақын Таразының жан баласынан қаймықпас қайсарлығын, тапқырлығы мен ақылдылығын айтып, оның адами болмысы кейінгі ұрпаққа үлгі болатынын жеткізді. Солардың арасында Қанатбай Елеусізұлы 1993 жылы Есет-Дәрібай қос батырдың мазары жаңартылып, үлкен ас берілгенін тілге тиек етіп, сол тарихи сәтті тарқатып айтып берді. Сонымен қатар оның жеке мұрағатынан бейнежазба ұсынылды.
Кітапхана қызметкері Балагүл Бакиева ақын Таразы Қаленқызының  өмірі мен шығармашылығына арналған «Тарих төріндегі Таразы» кітап көрмесіне библиографиялық шолу жасап, «Ақтөбенің киелі жерлері» бейнежазбасы мен фото-шежіре слайд ұсынды. Кітапхана оқырмандары Фариза Дабидбекқызы, Жүзім Мұратова Таразы ақынның атасы Есетке арнаған жоқтау, «Тума-туыстарға шығарып берген жоқтауынан» өлеңдерін оқып берсе, жыршы Демеубай Жолымбетов ақын Таразы мен Сарышолақтың айтысын және атасы Есетке арнаған жоқтауын орындады. Кеш соныңда кітапхана директоры Сұлушаш Хакимова барша оқырманға және ақынның ұрпақтарына алғысын айтты.