Бүгін «Оқитын өлке» облыстық акциясы аясында жазушы, сатирик, журналист Үмбетбай Уайдиннің 90 жылдығына арналған «Сырымды айтайыншы» әдеби кеші өтті.

Аталған шараға жазушы, сатирик, Қазақстан Жазушылар одағының мүшесі Төрежан Мәндібай, ақын, Қазақстан Жазушылар және Журналистер одағының мүшесі, білім беру және мәдениет саласының ардагері, ҚР Педагогикалық Ғылымдар Академиясының академигі Нұрлыбек Қалауов, журналист, сатирик, жазушы, Қазақстан Журналистер одағының мүшесі Ардақ Қонақбаева, Қазақстанның мәдениет қайраткері, жазушы сатирик, сатира жанры бойынша Үмбетбай Уайдин атындағы жүлде иегері, «Екі Езу» әзіл - сықақ театрының директоры Нұрлыбек Жұбатқан, «Ер Едіге» жыр мектебінің көркемдік жетекшісі, жырау, ұстаз Әділбек Сарин, кітапхана оқырмандары мен студент-жастар қатысты.

Қадірлі қонақтар қаламгердің өмір жолы мен шығармашылығы жайында жарқын естеліктерін ортаға салды. Сонымен бірге Үмбетбай Уайдиннің кісілік келбеті, адами болмысы мен ұстаздық қамқорлығы турасында кеңінен айтып берді. Алматы қаласынан онлайн байланысқа шыққан шәкірті, журналист Кәмшат Әбілқызы ұстазының адами қасиеттерін, өнегелі істерін сағынышпен еске алды.

Әдеби кеште «Ер Едіге» жыр мектебінің жетекшісі Әділбек Сарин шалқарлықтардың гимніне айналған «Шалқар вальсі» әнін әуелете шырқады. Ақтөбе жоғары гуманитарлық колледжінің студенттері Нұргүл Жұбатова, Ақниет Әбдімұрат және Ақнұр Сәрсенғалиева сатирик-жазушының «Бала – менің қуанышым, құмарым», «Ақыл. Сана. Сабыр» және «Гүлмен сырласу» өлеңдерін оқып, қошеметке бөленді. Әзіл-сықақ әңгімелері мен фельетондарын аталған колледж студенті Аңсар Таңжарбай өз деңгейінде жеткізіп, қатысушыларға ерекше көңіл күй сыйлады. Қаламгердің өмірлік серігі, жан жолдасы Мәриям Алданованың естен кетпес естелігін ақтарған бейнежазбасы тамашаланды. Сонымен қатар Үмбетбай Уайдиннің шығармашылығына арналған «Үмбетбайдан – үлгі» кітап көрмесі таныстырылды.

Шараны қорытындылаған кітапхана директоры Сұлушаш Хакимова сатирик-жазушының рухани мұралары жас ұрпаққа сарқылмас қазына екенін тілге тиек етіп, барша қатысушы қонақтарға, кітапхана оқырмандарына ризашылығын білдірді.