21 қараша күні кітапхана қызметкерлері №62 Б.Момышұлы атындағы жалпы білім беретін орта мектепте әскери қолбасшы, жазушы, Кеңес Одағының Батыры, Халық қаһарманы Бауыржан Момышұлының туғанына 115 жыл толуына орай «Ойнаған бұлт ішінде найзағайдай» тарихи кеш өткізді.

Екінші дүниежүзілік соғыстың даңқты қолбасшысы, Халық қаһарманы, Қазақстанның ұлттық мақтанышы Бауыржан Момышұлы – Мәскеу түбіндегі шайқаста көрсеткен теңдессіз ерлігімен әлемге танылған тұлға. Оның әскери шеберлігі, қайсар мінезі, жауынгерлік тәртіп пен отансүйгіштік туралы ойлары бүгін де өзекті. Батырдың «Ұшқан ұя», «Москва үшін шайқас» сынды шығармалары ұлт руханиятына қосылған құнды мұра болып табылады.

Тарихи кешке «Қазақстан өлкетанушылар одағы» облыстық филиалының төрағасы, «Қазақстанның үздік өлкетанушысы» Б.Б.Мырзабаев, Қ.Жұбанов атындағы АӨУ-нің «Жалпы педагогика және білім берудегі менеджмент» кафедрасының оқытушысы, доцент Г.Е.Елеусінова, №62 Б.Момышұлы атындағы ЖББОМ директорының орынбасары, қазақ тілі мен әдебиеті пәнінің мұғалімі А.Т.Қанымбаева қатысып, батырдың әскери стратегиясы мен қаһармандық тұлғасын, сонымен қатар әдеби мұрасының маңызы туралы баяндамалар жасады.

Шара барысында жоғары сынып оқушылары Е. Бақтығалиев Б. Момышұлының «Қайран сегіз» өлеңін, ал Б. Төлеген М. Мақатаевтың «Бауыржан Момышұлына» арнауын оқып берді. Сондай-ақ С.Арыстанбекова терме орындады.

Аталмыш кеште мектеп мұғалімдері мен оқушылары назарына батырдың өмірі мен шығармашылығына арналған «Тұлға тағылымы» атты кітап көрмесіне библиографиялық шолу ұсынылды. Сонымен қатар, «Өмір жолы» деректі фильмі көрсетіліп, «От пен қанды жолдар» атты Б.Момышұлының өз дауысымен жазылған бейнебаян тыңдалды.