2 ақпан күні Ұлттық баспасөз күніне орай «Баспасөз – ұлттың үні, рухтың жыры» атты кездесу кеші өтті.

         2023 жылы Қазақстан Республикасы Үкіметінің қаулысымен 2 ақпан – Ұлттық баспасөз күні болып бекітілген. Дәл осы күні, 1913 жылы, Алаш арыстары Ахмет Байтұрсынұлы, Әлихан Бөкейхан, Міржақып Дулатұлының бастамасымен «Қазақ» газетінің алғашқы саны жарық көрді.

         Бүгінде отандық баспасөз басылымдары ұлттық публицистиканың үздік дәстүрлерін сақтай отырып, қоғамды сенімді ақпаратпен қамтамасыз етіп келеді. Газет қызметкерлері, редакторлар мен баспагерлер халыққа білім мен мәдени мұраны жеткізіп, сараптамалық материалдардың сапасын арттыруға үлес қосуда.

         Кездесу кешіне Қазақстанның құрметті журналисі, ҚР ақпарат саласының үздігі, облыстық «Ақтөбе» газетінің тілшісі – Өтеміс Индира Сәрсенғалиқызы, «Хабар Сервис» ЖШС баспаханасының атқарушы директоры -  Жұбанов Жанболат Сақыпұлы және Ақтөбе Автожол колледжінің «Полиграфиялық және орау өндірісінің технологиясы» бірлестігінің пәндік-әдістемелік төрайымы-Зейдалиева Айнұр Нұрғалиқызы қатысты. Қонақтар өз сөздерінде баспасөз саласының тыныс-тіршілігімен таныстырып, қоғамдағы өзекті мәселелерді халыққа жеткізудегі журналист пен баспахана қызметкерлерінің рөліне тоқталды.

         Шараға Ақтөбе Автожол  және Сервис  колледждерінің оқытушылары мен студенттері, кітапхана саласының қызметкерлері  мен оқырмандары қатысты.

         Іс-шара барысында оқырмандар назарына «Баспасөз – елдің бүгіні, ертеңі, тарихы…» атты кітап көрмесі ұсынылды. Сонымен қатар  «QAZAQ» газетінің бас директоры Қали Қамбаровтың бейнеүндеуі, «Ахмет.Ұлт ұстазы» фильмінен үзінді, «Хабар-Сервис» және «Қазақ газеттері» ЖШС-рінің газет-журналдардың редакциядан баспаға дейінгі жұмысы туралы бейнематериалы көрсетілді.

         Кездесу кеші қатысушыларға рухани серпіліс сыйлап, ұлттық баспасөздің қоғамдағы маңызын тағы бір мәрте айқындай түсті.